എംജി യൂണിവേഴ്സിറ്റി ബിരുദ പരീക്ഷയില് 22 റാങ്കുകളും മികച്ച വിജയവും കരസ്ഥമാക്കി നിര്മല കോളജ്
മൂവാറ്റുപുഴ : എംജി യൂണിവേഴ്സിറ്റി ബിരുദ പരീക്ഷയില് 22 റാങ്കുകളും മികച്ച വിജയവും കരസ്ഥമാക്കി നിര്മല കോളജ് നേട്ടത്തിന്റെ നെറുകയില്. കോളജിന്റെ മികച്ച പഠനനിലവാരത്തിന്റെയും പരിശീലനത്തിന്റെയും അച്ചടക്കത്തിന്റെയും സാക്ഷ്യമായി കഴിഞ്ഞ ബിരുദ പരീക്ഷയില് മൂന്ന് എസ് ഗ്രേഡും 72 എ പ്ലസ് ഗ്രേഡും 154 എ ഗ്രേഡുമായി നിര്മല കോളേജ് തിളക്കമാര്ന്ന വിജയം നേടി.
ഫിസിക്സ് വിഭാഗത്തില് ആദ്യത്തെ നാല് റാങ്കുകളും കരസ്ഥമാക്കിയത് നിര്മല കോളജ് വിദ്യാര്ഥികളായ തെരേസ് ആന് ടോം, അഭയ് ശങ്കര്, ദേവിക ഷാജന്, ഗോപിക കൃഷ്ണന് എന്നിവരാണ്.15 എ പ്ലസ് ഗ്രേഡും 17 എ ഗ്രേഡും ഫിസിക്സ് ഡിപ്പാര്ട്ട്മെന്റിലെ വിദ്യാര്ഥികള് നേടി.
കൊമേഴ്സ് മോഡല് മൂന്ന് വിഭാഗത്തില് ഒന്നാം റാങ്ക് നേടിയ മീനു ഉണ്ണികൃഷ്ണനും റണ്ടാം റാങ്ക് നേടിയ ആന് മരിയ റോയിയും മൂന്നാം റാങ്ക് നേടിയ വിന്നി ജെയിംസും നാലാം റാങ്ക് നേടിയ ഫാത്തിമ ഷാഹുദീനും ബികോം മോഡല് ഒന്നില് റണ്ടാം റാങ്ക് നേടിയ സൊനാറ്റ ടോമും കൊമേഴ്സ് വിഭാഗത്തിന്റെ നേട്ടത്തിന് തിലകക്കുറി ചാര്ത്തി.
ഇതോടൊപ്പം സിഎ ഇന്റര് പാസായ റിന്സീന നിസാറും ആര്യ രാജനും കെ. കൃഷ്ണപ്രിയയും കൊമേഴ്സ് വിഭാഗത്തിന്റെ വിജയത്തിന് തിളക്കം കൂട്ടി.
ഒന്പത് എ പ്ലസ് ഗ്രേഡും 47 എ ഗ്രേഡും ഉള്പ്പെടെ 89 ശതമാനം വിജയം കൊമേഴ്സ് ഡിപ്പാര്ട്ട്മെന്റ് നേടി.
കെമിസ്ട്രി ഡിപ്പാര്ട്മെന്റിലെ അല്ക തോമസ് എസ് ഗ്രേഡോടെ മൂന്നാം റാങ്ക് കരസ്ഥമാക്കി. 13 എ പ്ലസ് ഗ്രേഡും 14 എ ഗ്രേഡും കെമിസ്ട്രി ഡിപ്പാര്ട്ട്മെന്റിലെ വിദ്യാര്ഥികള് നേടിയെടുത്തു.
സുവോളജിയില് രണ്ടാം റാങ്ക് നേടിയ ജി. ഗീതാഞ്ജലി ഇതേ ഡിപ്പാര്ട്ട്മെന്റിലെ അധ്യാപകനായ ഡോ. ജിജി കെ. ജോസഫിന്റെ മകളാണ്. അഞ്ച് എ പ്ലസ് ഗ്രേഡും 12 എ ഗ്രേഡും തെണ്ണൂറ് ശതമാനം വിജയവും സുവോളജി വിഭാഗത്തിന്റെ നേട്ടം മികവുറ്റതാക്കി.
21 എ പ്ലസ് ഗ്രേഡും 12 എ ഗ്രേഡും നേടി ഗണിത ശാസ്ത്ര വിഭാഗം അവരുടെ മികച്ച അക്കാദമിക പാരന്പര്യം കാത്തുസൂക്ഷിച്ചു. മൂന്ന് എ പ്ലസ് ഗ്രേഡും 19 എ ഗ്രേഡുമായി 97 ശതമാനം വിജയം കൈവരിച്ച ബോട്ടണി വിഭാഗം എക്കാലത്തെയും മികച്ച വിജയ ശതമാനം കൈവരിച്ചു.
ബിഎ മലയാള വിഭാഗത്തില് മൂന്നാം റാങ്ക് നേടിയ നിമിഷ മരിയ ബേബി മലയാളം ഡിപ്പാര്ട്ട്മെന്റിന്റെ റാങ്ക് പാരന്പര്യം കാത്തുസൂക്ഷിച്ചു. രണ്ട് എ പ്ലസ് ഗ്രേഡും ഏഴ് എ ഗ്രേഡുമായി മലയാളം വിഭാഗം ഉന്നത വിജയം കരസ്ഥമാക്കി.
കോളജ് മാനേജര് മോണ്. ചെറിയാന് കാഞ്ഞിരക്കൊന്പില്, പ്രിന്സിപ്പല് ഡോ. കെ.വി. തോമസ്, മുന് പ്രിന്സിപ്പല് ഡോ. ജെയിംസ് മാത്യു, വൈസ് പ്രിന്സിപ്പല് ഡോ. ജോര്ജി നീര്നാല്, കോളേജ് വൈസ് പ്രിന്സിപ്പല് പ്രഫ. സജി ജോസഫ്, ബര്സാര് ഫാ. ജസ്റ്റിന് കണ്ണാടന്, പൂര്വവിദ്യാര്ഥി സംഘടന നേതാക്കളായ തോമസ് കളന്പാട്ടുപറന്പില്, തോമസ് പാറക്കല് തുടങ്ങിയവര് റാങ്ക് ജേതാക്കളെ അഭിനന്ദിച്ചു.