നിര്‍മ്മാണം പൂര്‍ത്തീകരിച്ച കോരന്‍കടവ് പാലം ഗതാഗതത്തിനു തുറന്നു നൽകി
രാമമംഗലം: പശ്ചാത്തല മേഖലയിൽ ജനങ്ങൾക്ക് പ്രയോജനകരമാകുംവിധം ഒട്ടനവധി വികസന പ്രവർത്തനങ്ങൾ നടപ്പാക്കാൻ സംസ്ഥാന സർക്കാരിനു സാധിച്ചെന്ന് പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് പറഞ്ഞു. നിര്‍മ്മാണം പൂര്‍ത്തീകരിച്ച കോരന്‍കടവ് പാലം ഗതാഗതത്തിനു തുറന്നു നൽകികൊണ്ട് സംസാരിക്കുകയായിരുന്നു അദ്ദേഹം. ചടങ്ങിൽ ഓൺലൈനായാണ് മന്ത്രി പങ്കെടുത്തത്.അഞ്ച് വർഷത്തിനകം സംസ്ഥാനത്ത് 100 പാലങ്ങളുടെ നിർമ്മാണം പൂർത്തീകരിക്കാനാണ് സർക്കാർ ലക്ഷ്യമിടുന്നതെന്നും മന്ത്രി പറഞ്ഞു. പിറവം, കുന്നത്തുനാട് നിയോജകമണ്ഡലങ്ങളെ തമ്മിൽ ബന്ധിപ്പിക്കുന്ന പാലമാണിത്. പാലത്തിന്റെ നിർമ്മാണത്തോടെ രാമമംഗലം ഭാഗത്തുനിന്നും ദേശീയ പാതയായ കൊച്ചി ധനുഷ് കോടി റോഡിലേക്ക് വേഗത്തിൽ എത്തിച്ചേരാനാകും. ഇതോടെ രണ്ട് മണ്ഡലങ്ങളുടെയും ഗ്രാമീണ മേഖലയിൽ വൻ വികസന മുന്നേറ്റമുണ്ടാക്കാൻ കഴിയുമെന്നാണ് പ്രതീക്ഷ. മൂവാറ്റുപുഴയാറിന് കുറുകെ 134 മീറ്റർ നീളത്തിൽ ഇരുവശത്തും ഒന്നര മീറ്റർ നടപ്പാതയടക്കം 11 മീറ്റർ വീതിയിലാണ് പാലം നിർമ്മിച്ചിരിക്കുന്നത്. രണ്ടു വരി ഗതാഗതം സാധ്യമാക്കുന്നതിനായി ഏഴര മീറ്റർ വീതിയിൽ കാരിയേജ് വേയും ഇരു വശങ്ങളിലും ഒന്നര മീറ്റർ വീതിയിൽ നടപ്പാതയും വരുന്ന രീതിയിലാണ് പാലം നിർമ്മിച്ചിരിക്കുന്നത്.
2010 ലാണ് ജനങ്ങളുടെ ദീർഘകാലത്തെ ആവശ്യമായിരുന്ന കോരൻ കടവ് പാലത്തിന് ഫണ്ട് അനുവദിക്കുന്നത്. സംസ്ഥാന സർക്കാരിന്റെ ബജറ്റിൽ ഉൾപ്പെടുത്തി 9.15 കോടി രൂപ അനുവദിച്ചാണ് നിർമ്മാണ പ്രവർത്തനങ്ങൾ ആരംഭിച്ചത്. എന്നാൽ അപ്രോച്ച് റോഡിനെ ചൊല്ലി ഉയർന്ന സാങ്കേതിക പ്രശ്‌നങ്ങൾ മൂലം നിർമ്മാണം പാതിവഴിയിൽ നിലച്ചു. 2020 ൽ സർക്കാർ നിർമ്മാണ പ്രവർത്തനങ്ങൾ പുനരാരംഭിക്കാൻ ആവശ്യമായ നടപടികൾ സ്വീകരിച്ചു. അപ്രോച്ച് റോഡിന്റെ നിർമ്മാണത്തിനുൾപ്പെടെ അധികതുക കൂടി അനുവദിച്ചു. ചടങ്ങിൽ പി വി ശ്രീനിജിൻ എം. എൽ. എ. അധ്യക്ഷത വഹിച്ചു. അനൂപ് ജേക്കബ് എം.എല്‍.എ. മുഖ്യപ്രഭാഷണം നടത്തി. തോമസ് ചാഴിക്കാടൻ എം. പി. വിശിഷ്ടാതിഥിയായി. പൊതുമരാമത്ത് വകുപ്പ് എക്സിക്യൂട്ടീവ് എഞ്ചിനീയർ (പാലങ്ങൾ വിഭാഗം) നീന സൂസൻ പുന്നൻ റിപ്പോർട്ട്‌ അവതരിപ്പിച്ചു. ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ്, മുൻ എം.പി. പി.സി. തോമസ്, മുൻ എം. എൽ. എ. മാരായ എം. ജെ. ജേക്കബ്, എം. എം. മോനായി,പാമ്പാക്കുട ബ്ലോക്ക്‌ പഞ്ചായത്ത് പ്രസിഡന്റ് ആലീസ് ഷാജു, പൂത്തൃക്ക പഞ്ചായത്ത് പ്രസിഡന്റ് ടി. പി. വർഗീസ്, രാമമംഗലം പഞ്ചായത്ത് പ്രസിഡന്റ് ഇ. പി. ജോർജ്, പൊതുമരാമത്ത് വകുപ്പ് സൂപ്രണ്ടിങ് എഞ്ചിനിയർ പി. കെ. മിനി, വിവിധ ജനപ്രതിനിധികൾ, സാമൂഹ്യ – രാഷ്ട്രീയ പ്രവർത്തകർ തുടങ്ങിയവർ പങ്കെടുത്തു.
