സ്വകാര്യബസിലും പരിശോധന; ഡ്രൈവർ മദ്യപിച്ചാൽ നടപടി
തിരുവനന്തപുരം: സ്വകാര്യബസ് ജീവനക്കാര് മദ്യപിച്ചിട്ടുണ്ടോയെന്ന് പരിശോധിക്കുമെന്ന് മന്ത്രി കെ.ബി.ഗണേഷ് കുമാര്. കെഎസ്ആര്ടിസിക്ക് പിന്നാലെ സ്വകാര്യ ബസിലും ജോലിസമയത്ത് ഡ്രൈവര് മദ്യപിച്ചിട്ടുണ്ടോയെന്ന് കണ്ടെത്താന് സ്വകാര്യബസ് സ്റ്റാന്ഡുകളില് മോട്ടോര് വാഹനവകുപ്പിന്റെ സ്ക്വാഡ് പരിശോധന നടത്തുമെന്നും മന്ത്രി അറിയിച്ചു. ജോലി സമയത്ത് ഡ്രൈവര് മദ്യപിച്ചെന്ന് കണ്ടെത്തിയാല് അന്നത്തെ ട്രിപ് റദ്ദാക്കുമെന്നും മന്ത്രി പറഞ്ഞു. കെഎസ്ആര്ടിസി ജീവനക്കാര് മദ്യപിച്ചിട്ടുണ്ടോയെന്ന് പരിശോധിക്കാന് എല്ലാ ഡിപ്പോകളിലും ബ്രെത്തലൈസര് സ്ഥാപിക്കും. 20 എണ്ണം വാങ്ങിക്കഴിഞ്ഞെന്നും 50 എണ്ണം കൂടി ഈ മാസം തന്നെ വാങ്ങുമെന്നും മന്ത്രി പറഞ്ഞു.