പാചക വാതക വില വര്ധനവിനും ജനദ്രോഹ ബജറ്റിനുമെതിരേ എല്ഡിഎഫ് നിയോജക മണ്ഡലം കമ്മിറ്റി ബഹുജന മാര്ച്ചും ധര്ണയും നടത്തി.
മൂവാറ്റുപുഴ: കേന്ദ്ര സര്ക്കാരിന്റെ പാചക വാതക വില വര്ധനയ്ക്കെതിരേയും ജനദ്രോഹ ബജറ്റിനെതിരേയും എല്ഡിഎഫ് നിയോജക മണ്ഡലം കമ്മിറ്റിയുടെ നേതൃത്വത്തില് മൂവാറ്റുപുഴ ഹെഡ് പോസ്റ്റ് ഓഫീസിനു മുന്നിലേക്ക് ബഹുജന മാര്ച്ചും ധര്ണയും നടത്തി. കച്ചേരിത്താഴത്ത് നിന്ന് ആരംഭിച്ച മാര്ച്ച് നഗരം ചുറ്റി ഹെഡ് പോസ്റ്റ് ഓഫീസിനു മുന്നില് സമാപിച്ചു. തുടര്ന്ന് നടത്തിയ ധര്ണ എല്ദോ ഏബ്രാഹാം എംഎല്എ ഉദ്ഘാടനം ചെയ്തു. എന്. അരുണ് അധ്യക്ഷത വഹിച്ചു. എല്ഡിഎഫ് നേതാക്കളായ എം.ആര്. പ്രഭാകരന്, ടി.എം.ഹാരീസ്, എം.എ. സഹീര്, കെ.എന്. ജയപ്രകാശ്, ജോളി ജോര്ജ് നെടുങ്കല്ലേല്, സോജന് പിട്ടാപ്പിളില്, ഇ.ഐ. മത്തായി എന്നിവര് പ്രസംഗിച്ചു.
കൂത്താട്ടുകുളം: കേന്ദ്ര ഗവണ്മെന്റ് അവതരിപ്പിച്ച ജനദ്രോഹ ബജറ്റ് നിര്ദേശങ്ങള്ക്കെതിരെ ഇടതു പാര്ട്ടികള് ദേശവ്യാപകമായി നടത്തുന്ന സമരത്തിന്റെ ഭാഗമായി സിപിഐ നിയോജകമണ്ഡലം കമ്മിറ്റിയുടെ നേതൃത്വത്തില് കൂത്താട്ടുകുളം പോസ്റ്റ് ഓഫീസിലേക്ക് ബഹുജന മാര്ച്ച് നടത്തി.
കാര്ഷിക മേഖലയെ സംരക്ഷിക്കുക, പൊതുവിതരണ സംവിധാനം ശക്തമാക്കുക, വിലക്കയറ്റം തടയുക, തൊഴിലില്ലായ്മ പരിഹരിക്കാന് പദ്ധതികള് ആവിഷ്കരിക്കുക, ലാഭത്തില് പ്രവര്ത്തിക്കുന്ന പൊതുമേഖലാ സ്ഥാപനങ്ങളുടെ ഓഹരി വില്പന അവസാനിപ്പിക്കുക, കേരളത്തോട് കാട്ടുന്ന അവഗണന അവസാനിപ്പിക്കുക തുടങ്ങിയ ആവശ്യങ്ങള് ഉന്നയിച്ചായിരുന്നു സമരം. ബഹുജന മാര്ച്ച് സിപിഐ ജില്ലാ നിര്വാഹക സമിതിയംഗം കെ.എന്. ഗോപി ഉദ്ഘാടനം ചെയ്തു.
സിപിഐ നിയോജകമണ്ഡലം നിര്വാഹക സമിതിയംഗം എ.എസ്. രാജന് അധ്യക്ഷത വഹിച്ചു. നിയോജക മണ്ഡലം സെക്രട്ടറി സി.എന്. സദാമണി, മുണ്ടക്കയം സദാശിവന്, എ.കെ. ദേവദാസ്, അംബിക രാജേന്ദ്രന്, ജൂലി സാബു, കെ.പി. ഷാജഹാന് തുടങ്ങിയവര് പ്രസംഗിച്ചു.