പായിപ്ര ഗവ.യുപി സ്‌കൂളില്‍ തെളിച്ചം പഠന പോഷണ പദ്ധതിക്ക് തുടക്കമായി
മൂവാറ്റുപുഴ : കുട്ടികളിലെ ഭാഷാപരമായ അടിസ്ഥാന ശേഷികള്‍ ഉറപ്പിക്കുന്നതിനായി പായിപ്ര ഗവ യുപി സ്‌കൂളില്‍ നടപ്പിലാക്കുന്ന തെളിച്ചം പഠന പോഷണ പദ്ധതിക്ക് തുടക്കമായി. ഉപജില്ല വിദ്യാഭ്യാസ ഓഫീസര്‍ ജീജ വിജയന്‍ പദ്ധതിയുടെ ഉദ്ഘാടനം നിര്‍വ്വഹിച്ചു. പിടിഎ പ്രസിഡന്റ് പി.ഇ നൗഷാദ് അധ്യക്ഷത വഹിച്ചു. കുട്ടികളില്‍ അടിസ്ഥാന ശേഷികള്‍ ഉറപ്പിച്ച് എഴുത്ത്, വായന, സര്‍ഗാത്മകത എന്നിവയില്‍ സ്വതന്ത്ര രചനകളില്‍ ഏര്‍പ്പെടാന്‍ പ്രാപ്തരാക്കുക എന്നതാണ് പദ്ധതിയുടെ ലക്ഷ്യം. രാവിലെയും വൈകിട്ടും പ്രത്യേകം സമയം കണ്ടെത്തിയാണ് പദ്ധതി നടപ്പിലാക്കുന്നത്. ഇതിനായി പ്രത്യേകം പാഠ്യപദ്ധതിയും, രക്ഷിതാക്കളുടെ സഹകരണത്തോടെ പഠനോപകരണ നിര്‍മ്മാണ ശില്പശാലയും സംഘടിപ്പിച്ചിരുന്നു.
ചിത്രക്കാര്‍ഡുകള്‍, വായനക്കാര്‍ഡുകള്‍, വീഡിയോ ചിത്രങ്ങള്‍ എന്നിവ പ്രയോജനപ്പെടുത്തിയാണ് അധ്യാപകര്‍ ക്ലാസുകള്‍ നല്‍കുന്നത്. കുട്ടികള്‍ക്ക് ആവശ്യമായ പഠനോപകരണങ്ങള്‍ ജോയിന്റ് കൗണ്‍സില്‍ പായിപ്ര മേഖല കമ്മിറ്റി സംഭാവന ചെയ്തു. സീനിയര്‍ ക്ലര്‍ക്ക് ബേസില്‍ സി മാത്യു മുഖ്യപ്രഭാഷണം നടത്തി.ഹെഡ്മിസ്ട്രസ് വി.എ റഹീമ ബീവി പദ്ധതി വിശദീകരണം നടത്തി. അധ്യാപകരായ കെ.എം നൗഫല്‍, അജിത രാജ്, നിസാമോള്‍, അജ്മി ഇബ്രാഹിം, സലീന എ, റഹ് മത്ത് എഎം, ഷൈന നിഷാദ്, അനീസ കെഎം, എന്നിവര്‍ പ്രവര്‍ത്തനങ്ങള്‍ക്ക് നേതൃത്വം നല്‍കുന്നു.
