കോതമംഗലം സ്വദേശിയായ രണ്ടുവയസുകാരന് എറണാകുളത്ത് നിന്ന് ജീവന്‍രക്ഷാ മരുന്നെത്തിച്ച്‌ അഗ്നിരക്ഷാസേന.
കോതമംഗലം: ലോക്ക്ഡൗണില്‍ കോതമംഗലം സ്വദേശിയായ രണ്ടുവയസുകാരന് എറണാകുളത്ത് നിന്ന് ജീവന്‍രക്ഷാ മരുന്നെത്തിച്ച്‌ അഗ്നിരക്ഷാസേന. കോതമംലം ഇരമല്ലൂരില്‍ താമസിക്കുന്ന പാലക്കൂട്ടില്‍ ജയന്തിയുടെ മകന്‍ ശ്രേയസിനാണ് മരുന്ന് എത്തിച്ചത്.ഹൃദയ സംബന്ധമായ അസുഖത്തിന് എറണാകുളം ലിസി ആശുപത്രിയിലെ ഡോക്ടര്‍മാരുടെ കീഴിലാണ് ശ്രേയസിനെ ചികിത്സിച്ചിരുന്നത്. ലോക്ക് ഡൗണ്‍ പ്രഖ്യാപിച്ചതോടെ സ്ഥിരം നല്കിയിരുന്ന മരുന്ന് ലഭിക്കാതെ വന്നു. ഇതോടെയാണ് അഗ്നിരക്ഷാസേന രക്ഷകരായത്.ലിസി ആശുപത്രിയില്‍ നിന്നും ഗാന്ധിനഗര്‍ അഗ്നിരക്ഷാ നിലയം വഴി മരുന്ന് കല്ലൂര്‍ക്കാട് അഗ്നിരക്ഷാ നിലയത്തിലെത്തിക്കുകയായിരുന്നു.കല്ലൂര്‍ക്കാട് ഫയര്‍സ്റ്റേഷനിലെ ഫയര്‍ ഓഫീസര്‍ ബിച്ചു, ലിബിന്‍ എന്നിവര്‍ ജീവന്‍രക്ഷാ മരുന്ന് കോതമംഗലം അഗ്നിരക്ഷാ നിലയത്തിലെത്തിച്ചു.
കോതമംഗലം ഫയര്‍ഫോഴ്സ് അസിസ്റ്റന്‍റ് സ്റ്റേഷന്‍ ഓഫീസര്‍ സജി മാത്യുവിന്‍റെ നേത്യത്വത്തില്‍ ജിവനക്കാരായ പി.എന്‍ അനൂപ്, എസ.് നജീം, ഉണ്ണികൃഷ്ണന്‍ എന്നിവര്‍ ഇരമല്ലൂരിലെ ശ്രേയസിന്‍റെ വീട്ടില്‍ മരുന്ന് എത്തിച്ച്‌ നല്‍കുകയായിരുന്നു.
