മണ്ണത്തൂര് അത്താണിക്കല് കവലയിലെ വെയിറ്റിംഗ് ഷെഡ് നിര്മാണത്തേച്ചൊല്ലി തര്ക്കം.
കൂത്താട്ടുകുളം: മണ്ണത്തൂര് അത്താണിക്കല് കവലയിലെ വെയിറ്റിംഗ് ഷെഡ് നിര്മാണത്തേച്ചൊല്ലി തര്ക്കം. ഇതേത്തുടര്ന്ന് പോലീസ് സ്ഥലത്ത് നിലയുറപ്പിച്ചു. യൂഡിഎഫ്, എല്ഡിഎഫ് പ്രവര്ത്തകര് തമ്മിലുണ്ടായ സംഘര്ഷ സാധ്യത കണക്കിലെടുത്താണ് പോലീസ് സ്ഥലത്ത് തുടരുന്നത്.
തിരുമാറാടി പഞ്ചായത്ത് നടത്തിവന്ന നിര്മാണ പ്രവര്ത്തികള് യുഡിഎഫ് പ്രവര്ത്തകര് തടഞ്ഞതാണ് സംഘര്ഷത്തിനു കാരണമായത്.
റോഡിലെ മീഡിയനില് നിന്നിരുന്ന അത്താണിക്കല്ല് മാറ്റി വെയിറ്റിംഗ് ഷെഡ് നിര്മിക്കാനുള്ള പഞ്ചായത്ത് നടപടിക്കെതിരേ ആഴ്ചകളായി യുഡിഎഫ് പ്രതിഷേധത്തിലായിരുന്നു.രണ്ടാഴ്ച മുമ്ബ് നിര്ത്തിവച്ചിരുന്ന നിര്മാണ പ്രവര്ത്തികള് ഇന്നലെ രാവിലെ 5.30ന് ആരംഭിച്ചു.
അനൂപ് ജേക്കബ് എംഎല്എ, കെപിസിസി ജനറല് സെക്രട്ടറി ജെയ്സണ് ജോസഫ്, കേരളാ കോണ്ഗ്രസ്-ജേക്കബ് ജില്ലാ പ്രസിഡന്റ് രാജു പണാലിക്കല് എന്നിവരുടെ നേതൃത്വത്തില് എത്തിയാണ് യുഡിഎഫ് പ്രവര്ത്തകര് നിര്മാണം തടഞ്ഞത്. സിപിഎം ഏരിയ സെക്രട്ടറി ഷാജു ജേക്കബ്, പഞ്ചായത്ത് പ്രസിഡന്റ് ഒ.എന്. വിജയന്, എല്ഡിഎഫ് പഞ്ചായത്ത് അംഗങ്ങള് തുടങ്ങിയവര് നിര്മാണ പ്രവര്ത്തികള് തുടരണമെന്ന് ആവശ്യപ്പെട്ട് എത്തിയതോടെ സംഘര്ഷഭരിതമാകുകയായിരുന്നു. സിഐ കെ.ആര്.മോഹന്ദാസിന്റെ നേതൃത്വത്തിലുള്ള പോലീസ് എത്തിയാണ് രംഗം ശാന്തമാക്കിയത്.