കോണ്വന്റുകള്ക്കും അഗതിമന്ദിരങ്ങള്ക്കും സൗജന്യറേഷനുള്ള നടപടിക്രമങ്ങള് ഉദാരമാക്കി
മൂവാറ്റുപുഴ: കോവിഡ് 19ന്റെ പശ്ചാത്തലത്തില് കോണ്വന്റുകള്ക്കും അഗതി-അനാഥ മന്ദിരങ്ങള്ക്കും സര്ക്കാര് പ്രഖ്യാപിച്ച സൗജന്യറേഷനും കിറ്റ് വിതരണത്തിനുമുള്ള നടപടി ക്രമങ്ങള് ഉദാരമാക്കി. കിറ്റ് വിതരണത്തിലെ ബുദ്ധിമുട്ടുകള് ചൂണ്ടിക്കാട്ടി മൂവാറ്റുപുഴ ബ്ലോക്ക് പഞ്ചായത്തംഗം ടി.എം. ഹാരീസും വിവിധ അഗതി മന്ദിര അധികൃതരും നടപടി ക്രമങ്ങള് ഉദാരമാക്കണമെന്നാവശ്യപ്പെട്ട് നിവേദനം നല്കിയിരുന്നു. കഴിഞ്ഞ ഏഴിന് സര്ക്കാര് ഇറക്കിയ ഉത്തരവില് അഗതി മന്ദിരങ്ങള്, ക്ഷേമസ്ഥാപനങ്ങള്, കോണ്വന്റുകള് എന്നിവയ്ക്ക് സൗജന്യ റേഷന് ലഭിക്കാനായി ജില്ലാ സാമൂഹ്യക്ഷേമ വകുപ്പ് ഓഫീസില് നേരിട്ടെത്തി അനുമതി വാങ്ങിക്കണമായിരുന്നു.എന്നാല് സാമൂഹിക ക്ഷേമവകുപ്പിന്റെ ജില്ലാ ഓഫീസ് ജില്ലാ കേന്ദ്രത്തിലായതും ഗതാഗത സൗകര്യം ലഭ്യമല്ലാത്തതും ഈ രംഗത്ത് സൗജന്യ റേഷന് ലഭിക്കാതെ വരുന്ന സ്ഥിതിയുണ്ടായി. ഇതോടെയാണ് നിവേദനവുമായി അധികൃതരെ സമീപിച്ചത്. അഗതി മന്ദിരത്തിലെ അന്തേവാസികളുടെ ദുരിതം മനസിലാക്കിയ സിവില് സപ്ലൈസ് ഉദ്യോഗസ്ഥര് നേരിട്ട് സാമൂഹിക ക്ഷേമ വകുപ്പ് ഓഫീസിലെത്തി അംഗീകാരം വാങ്ങണമെന്നും അപേക്ഷകള് മറ്റ് രേഖകള്ക്കൊപ്പം ജില്ലാ സപ്ലൈ ഓഫീസര്ക്ക് ഓണ്ലൈനില് അയച്ചാല് മതിയെന്നും ധാരണയായതോടെയാണ് പ്രതിസന്ധിക്ക് പരിഹാരമായത്.