മുബാര്‍ക്ക് വീല്‍ ചെയറിലെത്തി പരീക്ഷ എഴുതി
മൂവാറ്റുപുഴ: സാഹചര്യങ്ങളോട് പടവെട്ടി മുബാര്‍ക്ക് റഷീദ് വീല്‍ ചെയറിലെത്തി പരീക്ഷ എഴുതി. അപകടത്തില്‍ പരിക്കേറ്റ് ശരീരത്തിന്‍റെ ഒരു ഭാഗം തളര്‍ന്ന് ചികിത്സയിലായിരുന്ന മുബാര്‍ക്ക് പിതാവ് റഷീദിനോപ്പമാണ് പരീക്ഷയ്ക്കെത്തിയത്. പരീക്ഷ എഴുതാന്‍ മുബാര്‍ക്കിനെ സഹായിയായി മറ്റൊരു വിദ്യാര്‍ഥിയെയും സ്കൂള്‍ അധികൃതര്‍ ഒരുക്കിയിരുന്നു.
2018ലെ വേനല്‍ അവധിയില്‍ കൂട്ടുകാരുമൊത്ത് പുഴയില്‍ കുളിക്കാന്‍ പുഴയില്‍ പോയപ്പോളാണ് വിധി മുബാര്‍ക്കിനെ വേട്ടയാടുന്നത്. മണല്‍ ചുഴിയില്‍ പെട്ടുപോയപ്പോഴുണ്ടായ അപകടത്തില്‍ സ്പൈനല്‍ കോഡിലുണ്ടായ തകരാറിനെത്തുടര്‍ന്ന് ശരീരത്തിന്‍റെ ഒരു ഭാഗം തളര്‍ന്നു പോവുകയായിരുന്നു.തുടര്‍ന്ന് ഏറെനാളുകളായി ചികിത്സയിലായിരുന്നു. പത്താം ക്ലാസ് പഠനം പുര്‍ത്തീകരിക്കണമെന്ന തന്‍റെ ആഗ്രഹം നിറവേറുന്ന സന്തോഷത്തിലാണ് മുബാര്‍ക്ക് ഇപ്പോള്‍. ഈ അധ്യയന വര്‍ഷത്തില്‍ മൂവാറ്റുപുഴ നിര്‍മല ഹയര്‍ സെക്കന്‍ഡറി സ്കൂളില്‍നിന്ന് ഓണ്‍ലൈന്‍ പഠനത്തിലൂടെയാണ് പരീക്ഷയ്ക്ക് തയാറെടുത്തത്.
അധ്യാപകര്‍ മുബാര്‍ക്കിന്‍റെ വീട്ടിലെത്തി പ്രത്യേക പരിശീലനം നല്‍കിയിരുന്നതായി പ്രിന്‍സിപ്പല്‍ റവ. ഡോ. ആന്‍റണി പുത്തന്‍കുളം പറഞ്ഞു.
