സംസ്ഥാനത്ത് തദ്ദേശ സ്വയംഭരണസ്ഥാനങ്ങളിലേക്കുളള തെരഞ്ഞെടുപ്പ് തീയതി പ്രഖ്യാപിച്ചു
മൂവാറ്റുപുഴ : സംസ്ഥാനത്ത് തദ്ദേശ സ്വയംഭരണസ്ഥാനങ്ങളിലേക്കുളള തെരഞ്ഞെടുപ്പ് മൂന്ന് ഘട്ടമായി നടത്താന് തെരഞ്ഞെടുപ്പ് കമ്മിഷന്റെ തീരുമാനം. ഡിസംബര് 8, 10, 14 തീയതികളിലാണ് വോട്ടെടുപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളിലായിരിക്കും (ഒന്നാം ഘട്ട) എട്ടാം തീയതി തെരഞ്ഞെടുപ്പ്. ഡിസംബര് പത്ത് വ്യാഴാഴ്ച കോട്ടയം, എറണാകുളം, തൃശൂര്, പാലക്കാട്, വയനാട് ജില്ലകളിലാണ് രണ്ടാം ഘട്ട വോട്ടെടുപ്പ്. ഡിസംബര് 14ന് മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് മൂന്നാംഘട്ടമായി വോട്ടെടുപ്പ് നടത്തും. ഡിസംബര് 16 ബുധനാഴ്ചയാണ് വോട്ടെണ്ണല്.
സംസ്ഥാനത്ത് 1199 തദ്ദേശ സ്ഥാപനങ്ങളിലാണ് തിരഞ്ഞെടുപ്പ് നടക്കുന്നത്.
941 ഗ്രാമ പഞ്ചായത്ത്, 152 ബ്ലോക്ക് പഞ്ചായത്ത്, 14 ജില്ലാ പഞ്ചായത്ത്, 86 മുന്സിപ്പാലിറ്റികള്, 6 കോര്പ്പറേഷനുകലിലേക്കുമാണ് തെരഞ്ഞെടുപ്പ് നടത്തുന്നത്. 21,865 വാര്ഡുകളിലേക്കാണ് തെരഞ്ഞെടുപ്പ്. കോവിഡ് പ്രോട്ടോക്കോള് കര്ശനമായും പാലിച്ചായിരിക്കും തെരഞ്ഞെടുപ്പെന്ന് സംസ്ഥാന തെരഞ്ഞെടുപ്പ് കമ്മിഷണര് വി ഭാസ്ക്കരന് മാദ്ധ്യമങ്ങളോട് പറഞ്ഞു.
34,744 പോളിംഗ് സ്റ്റേഷനുകളാണ് സംസ്ഥാനത്ത് സജ്ജമാക്കിയിരിക്കുന്നത്. ഇലക്ട്രോണിക്ക് വോട്ടിംഗ് മെഷീനുകളുടെ പരിശോധന നവംബര് പത്തിനകം പൂര്ത്തിയാക്കും. കോവിഡ് പോസിറ്റീവ് ആകുന്നവര്ക്കും ക്വാറന്റീന് ആകുന്നവര്ക്കും പോസ്റ്റല് വോട്ടിംഗിനുളള സൗകര്യമുണ്ടാകും. മൂന്ന് ദിവസത്തിന് മുമ്പ് തപാല് വോട്ടിനായി അപേക്ഷിക്കണം.