സംസ്ഥാനത്ത് പ്ലസ് വൺ ഓൺലൈൻ ക്ലാസുകൾ നവംബര് രണ്ടിന് ആരംഭിക്കാൻ തീരുമാനം.
മൂവാറ്റുപുഴ: സംസ്ഥാനത്ത് പ്ലസ് വണ്ണിന്റെ ഓണ്ലൈന് ക്ലാസുകള് നവംബര് രണ്ടിന് ആരംഭിക്കാൻ തീരുമാനം. പ്ലസ് വണ് പ്രവേശനം പൂര്ത്തിയായ സാഹചര്യത്തിലാണ് ഓണ്ലൈന് ക്ലാസുകള് ആരംഭിക്കാനുള്ള തീരുമാനം സർക്കാർ അറിയിച്ചത്. ഇതിനു മുന്നോടിയായി പല പ്ലാറ്റ് ഫോമുകളിലായിരുന്ന വിവിധ മീഡിയത്തിലെ ക്ലാസുകള് firstbell.kite.kerala.gov.in എന്ന ഒറ്റ പോര്ട്ടലിലേക്ക് മാറ്റി.
സംസ്ഥാനത്ത് ഇതോടെ ഓണ്ലൈന് ക്ലാസുകളുടെ ഭാഗമാകുന്ന കുട്ടികളുടെ എണ്ണം 45 ലക്ഷമാകും.രാവിലെ ഒമ്പതര മുതല് പത്തര വരെ രണ്ട് ക്ലാസുകളാണ് തുടക്കത്തിൽ പ്ലസ് വൺ ക്ലാസ്സിന് ഉണ്ടാവുക.
പ്രീ പ്രൈമറി വിഭാഗത്തിലെ കിളിക്കൊഞ്ചല് ആദ്യ ആഴ്ച ശനി, ഞായര് ദിവസങ്ങളില് ആയിരിക്കും. ഇത് പിന്നീട് ക്രമീകരിക്കും. അവധി ദിവസങ്ങള് കൂടി പ്രയോജനപ്പെടുത്തി ഹയര് സെക്കന്ഡറി വിഭാഗത്തിലെ ചില വിഷയങ്ങളും പ്രൈമറി, അപ്പര് പ്രൈമറി ക്ലാസുകളിലെ ഭാഷാ വിഷയങ്ങളും പഠനം തുടങ്ങാനും തീരുമാനമായി.